Nadeem Sarwar
Rehan Azmi
Siyah Raat Mein Zindan Ke Dar Pe Ro Ro Ke
Sakina Kehti Hai Baba Ye Shab Satati Hai
Judai Ap Ki Us Par Ye Khak Ka Bistar
Kahin Andhaire Mein Bachon Ko Neend Ati Hai
Ye Sun Ke Zainab E Mazloom Boli Gham Na Karo
Kahani Kehti Hun Main Ek Suno Sakina Suno
Sakina Kahani Suno
Ik Shahenshah Tha Yasrab Mein Raha Karta Tha
Us Ka Ghar Woh Tha Ke Quran Jahan Utra Tha
Dar Pe Jibreel Sa Darbaan Raha Karta Tha
Us Ka Aangan Bhi Sitaron Se Bhara Rehta Tha
Us Ke Darwaze Se Khali Na Koi Jata Tha
Aasman Us Ki Sakhawat Ki Qasam Khata Tha
Han Sakina Kahani Suno
Us Ke Baba Ko Dar E Ilm Kaha Jata Tha
Maan Ne Shehzadi E Konain Laqab Paya Tha
Us Ke Baiton Mein Nazar Aks E Nabi Ata Tha
Betion Ko Gul E Pakeeza Kaha Jata Tha
Us Ke Ik Bhai Ki Rag Rag Mein Wafa Rehti Thi
Ik Behan Sath Mein Saye Ki Tarah Rehti Thi
Han Sakina Kahani Suno
Aik Din Kya Huwa Woh Ghar Se Safar Par Nikla
Us Ka Sab Kunba Bhi Quran Ki Hifazat Ko Chala
Ashqiya Ne Use Phir Dasht E Bala Mein Ghaira
Teen Din Tak Use Pani Bhi Muyassar Na Hua
Ho Gai Aam Har Ik Jor O Jafa Us Ke Liye
Aur Phir Jang Ka Maidan Saja Us Ke Liye
Han Sakina Kahani Suno
Us Ke Ik Bete Ke Seene Mein Sinan Toot Gai
Bhai Ke Hath Kate Teer Laga Mashk Chidi
Lash Pamal Bhateeje Ki Bhi Maqtal Mein Hui
Be Zaban Qatl Hua Us Ka Churi Us Pe Chali
Us Shehanshah Ke Kunbe Pe Ghareebi Chai
Bujh Gaye Sare Diye Sham E Ghareeban Aai
Han Sakina Kahani Suno
Khaime Jalne Lage Nazdeek Sitam Gar Aaye
Us Shehanshah Ki Bachi Ne Tamanche Khaye
Kaan Zakhmi Huye Khoon Ankhon Se Tapka Haye
Dhund Baap Ko Maqtal Mein Woh Kaise Jaye
Jalte Daman Ko Liye Ganj E Shaheedan Mein Gai
Rassi Gardan Mein Bandhi Shaam Ke Zindaan Mein Gai
Han Sakina Kahani Suno
Phir Sakina Ne Kaha Rehte Hain Wo Log Kahan
Boli Zainab Ke Huye Sab Woh Aseer E Zindaan
Qissa Akhir Hua Neend Ai Na Tum Ko Meri Jaan
Boli Ro Ro Ke Sakina Phuphi Ab Neend Kahan
Tum To Kehti Thi Kahani Suno Neend Ati Hai
Is Kahani Se Meri Neend Udhi Jati Hai
Han Sakina Kahani Suno
Boli Ro Ro Ke Sakina Yeh Mera Qissa Hai
Is Kahani Ka Shahenshah Mera Baba Hai
Naiza Jis Ke Laga Seene Mein Mera Bhaiya Hai
Mera Asghar Hai Laeenon Ne Jise Maara Hai
Be Rida Tum Ho Phuphi Jaan Meri Jati Hai
Ye Kahani To Mere Ghar Ki Nazar Aati Hai
Han Sakina Kahani Suno
Jis Ko Seene Pe Shehahnshah Ke Neend Ati Thi
Dasht Mein Haye Chacha Keh Ke Jo Chillati Thi
Jis Ke Kanon Se Lahu Behta Tha Jo Pyasi Thi
Apne Baba Ki Judai Mein Mari Jati Thi
Us Shahenshah Ki Beti Woh Sakina Main Hun
Jis Ka Dushwar Huwa Qaid Mein Jeena Main Hun
Han Sakina Kahani Suno
Khatm Jab Sarwar O Rehan Kahani Ye Hui
Woh Jo Sunti Thi Kahani Woh Sakina Na Rahi
Thame Zanjeer Naqahat Se Uthaye Qaidi
Aik Nanhi Si Lehad Kanpte Hathon Se Bani
Sar Shahenshah Ka Goudi Mein Lahu Rota Tha
Wa Hussaina Ka Bas Ik Shor Bapa Hota Tha
