Bab e Hawaij Ka Wasta

Kaisa Maraz Hai Ati Nahi Dawa Bhi Kaam
Roti Hai Shab Tarhap Ke Sisakti Hai Subh O Sham
Leta Hai Hasraton Se Jahan Bas Tera Hi Naam
Be Maot Mar Rahe Hain Hamen Ab Tu Hi Bacha
Allah Tujhe Bab E Hawaij Ka Wasta
Shafi Hai Tu Marez Ko Ab Jald De Shifa

Kaisi Waba Hai Ata Nahi Koi Aas Paas
Ek Hashar Sa Bapa Hai Nahi Hosh Aur Hawaas
Marne Ke Khaof Se Hai Dill E Natawan Udas
Ghaire Huye Hai Rooh Ko Jaise Koi Balaa
Allah Tujhe Bab E Hawaij Ka Wasta
Shafi Hai Tu Marez Ko Ab Jald De Shifa

Kitne Darakht Andhi Se Pal Mein Ukharh Gaye
Bachon Se Bap Bap Se Bache Bicharh Gaye
Ghar Ghar Wo Maot Aai Keh Ghar Ghar Ujarh Gaye
Kaisa Hai Roag Jane Khuda Kaisi Hai Waba

Yad Ata Hai Damon Ka Ukharhna Wo Bar Bar
Wo Be Kasi Wo Aah O Buka Cheekh Aur Puka
Zainab Se Sabr Se Hamen Mil Jata Hai Karaar
Bhai Pe Ek Behan Ne Kiya Bachon Ko Fida
Allah Tujhe Bab E Hawaij Ka Wasta
Shafi Hai Tu Marez Ko Ab Jald De Shifa

Jo Zakhm Zindagi Ko Mile Bhar Na Payen Gy
Ham Se Bicharh Gaye Hain Jo Wo Yad Ayen Gy
Apnon Ke Dard Khoon Ke Aansoo Rulayen Gy
Mar Jate Ham Jo Samne Hoti Na Karbala
Allah Tujhe Bab E Hawaij Ka Wasta
Shafi Hai Tu Marez Ko Ab Jald De Shifa

Haqqaniyat Mein Hote Hain Jo Log Be Nazeer
Ahl E Wila Hain Sufi Hain Darwaish Hain Faqeeh
Haakim Ne Jin Ko Kar Diya Hai Be Khata Aseer
Qaid E Sitam Se Kar De Unhen Jald Hi Rihaa

Bemarion Mein Jab Se Giraftar Ho Gaye
Ham To Sabhi Ke Waste Ek Baar Ho Gaye
Jin Ke Liye Thy Phool Kabhi Khaar Ho Gaye
Mohtaj Tu Kisi Ko Kisi Ka Nahi Bana
Allah Tujhe Bab E Hawaij Ka Wasta
Shafi Hai Tu Marez Ko Ab Jald De Shifa

Woh Mushkilat Ham Pe Parhin Choor Ho Gaye
Ham Dekhte Hi Dekhte Majboor Ho Gaye
Maqrooz Kya Huye Hain Keh Sab Door Ho Gaye
Kar De Hamare Qarz Ko Jaldi Se Tu Adaa
Allah Tujhe Bab E Hawaij Ka Wasta
Shafi Hai Tu Marez Ko Ab Jald De Shifa

Tauqeer Aur Tejani Ki Hai Yehi Arzu
Shohada E Karbala Ki Karen Bas Woh Guftagoo
Naslen Bahayen Un Ki Gham E Shah Mein Lahoo
Chalta Rahe Yeh Noha O Matam Ka Silsila
Allah Tujhe Bab E Hawaij Ka Wasta
Shafi Hai Tu Marez Ko Ab Jald De Shifa

Ya Sakhi Abbas Bab E Hawaij