Abbas Sa Bhai

Abbas Sa Bhai Lyrics

Jab Hoye Bazu e Abbas Qalam Darya Par
Gir Ke Thanda Howa Hazrat Ka Alam Darya Par
Garq e Khoon Ho Gaya Woh Behar e Karam Darya Par
Gul Tha Zakhmi Howa Saqa e Haram Darya Par
Mashk Ko Danton Mein Pakray Hoye Youn Lata Hai
Dahan e Shair Mein Jis Tarha Shikar Aata Hai
Al Garz Lasha e Abbas Pe Aaye Maula
Sar Ko Zanu Pe Rakha Our Yeh Ro Ro Ke Kaha
Bhai Tu Aaj Humein Keh Do Khudara Bhaiya
Naza Mein Bhai Ko Abbas Ne Bhai Bola
Aakhri Sans Li Our Dar e Fana Chor Diya
Bhai Ne Bhai Ki Aagosh Mein Dam Toor Diya

Hazrat Se Juda Ho Gaya Abbas Sa Bhai

Pardais Mein Looti Gayi Haider Ki Kamai
Hazrat Se Juda Ho Gaya Abbas Sa Bhai

Sheh Ne Yeh Kaha Lasha e Saqa e Haram Se
Baba Ki Tarha Tum Bhi Juda Ho Gaye Hum Se
Do Bar Yateemi Meri Behno Pe Hai Aai
Hazrat Se Juda Ho Gaya Abbas Sa Bhai

Mazloom Se Maqtal Mein Chala Hi Nahi Jata
Jab Khak Pe Girtay Hain Utha Bhi Nahi Jata
Ghazi Ki Shahadat Ne Kamar Aisi Jhukai
Hazrat Se Juda Ho Gaya Abbas Sa Bhai

Bachi Ne Kaha Shah Se Farz Apna Nibhaon
Nazdeek Agar Hai Koi Basti Tu Main Jaon
Ammo Ka Kafan Laye Gi Ammo Ki Fidai
Hazrat Se Juda Ho Gaya Abbas Sa Bhai

Abbas Ke Bachoon Se Main Sharminda Rahon Ga
Maqtal Se Utha Laya Hoon Har Aik Ka Lasha
Afsoos Ke Abbas Ki Maiyyat Na Uthai
Hazrat Se Juda Ho Gaya Abbas Sa Bhai

Khat Khak Pe Dete Thy Qadam Zeen Se Jis Ke
Maidan Mein Oss Shair Ke Itnay Hoye Tukre
Sajjad Ne Chadar Mein Woh Maiyat Hai Uthai
Hazrat Se Juda Ho Gaya Abbas Sa Bhai

Darya Bhi Tarapne Laga Ye Dekh Ke Manzar
Yaad Aane Laga Seena e Humshakal e Payamber
Jab Mashk Kate Hath Se Maula Ne Churai
Hazrat Se Juda Ho Gaya Abbas Sa Bhai

Sadiyon Se Hai Tari Yeh Fiza Ranj o Alam Ki.
Yeh Chand Jo Ojhal Howa Nazron Se Haram Ki
Phir Sani e Zahra Ne Kahan Eid Manai
Hazrat Se Juda Ho Gaya Abbas Sa Bhai

Ammo Ki Judai Pe Bohat Roye Hain Baba
Samjhati Hai Ro Ro Ke Yeh Bachoon Ko Sakina
Ab Dena Nahi Koi Bhi Pani Ki Duhai
Hazrat Se Juda Ho Gaya Abbas Sa Bhai

Har Matami Seene Pe Bapa Ho Ga Talatum
Iss Saal Tera Jana Tu Mushkil Hai Takallum
Nohay Ki Magar Karbobala Tak Hai Rasai
Hazrat Se Juda Ho Gaya Abbas Sa Bhai