Sakina Yaad Ayegi

Sakina Sakina Sakina

Qafila Sham Ke Zindan Se Jab Nikla Riha Ho Kar
Kaha Sajjad Ne Ro Kar
Ke Jab Jab Sans Aye Gi
Sakina Yaad Ayegi

Na De Paya Use Pani Yehi Bas Ik Udasi Hai
Sakina Kal Bhi Pyasi Thi Sakina Ab Bhi Pyasi Hai
Keh Jab Sughra Madine Mein Mujhe Pani Pilaye Gi
Sakina Yaad Ayegi

Hamesha Shimr Ke Darr Se Mere Hamraah Rehti Thi
Tamancha Jab Bhi Lagta Tha Mujhe Awaz Deti Thi
Museebat Sham Ki Haye Mujhe Jab Bhi Rulaye Gi
Sakina Yaad Ayegi

Shab E Ghurbat Mein Asghar Ki Use Jab Yad Ati Thi
Jaly Jhoole Ke Pas Aa Kar Wo Ashkon Ko Bahati Thi
Ali Asghar Ke Jhoole Par Nazar Jab Meri Jayegi
Sakina Yaad Ayegi

Yeh Ro Kar Sham Walon Se Kaha Sajjad Ne Sun Lo
Kabhi Na Marna Durre Kisi Masoom Bachi Ko
Keh Jab Nanhe Se Hathon Se Woh Gaalon Ko Chupaye Gi
Sakina Yaad Aayegi

Padar Ko Yad Karti Thi Andheri Qaid Mein Reh Ke
Sakina Mar Gai Akhir Lipat Kar Bap Ke Sar Se
Kahani Jab Yeh Sughra Ko Koi Bibi Sunaye Gi
Sakina Yaad Ayegi

Bandhy Thy Hath Bachi Ke Gale Mein Thi Rasan Haye
Barhi Mazloom Thi Pardais Mein Meri Behan Haye
Museebat Chaar Sala Ki Mujhe Har Pal Rulaye Gi
Sakina Yaad Ayegi

Ijazat Den Gi Shehzadi Woh Din Bhi Jald Aye Ga
Bulawa Aaye Ga Zeeshan O Irfan E Aza Sab Ka
Yateema Ke Haram Par Jab Nazar Zayer Ki Jaye Gi
Sakina Yaad Ayegi