Khoon Barsa

Khoon Barsa Lyrics in Urdu

خون برسا
خون برسا نہ برسنا تھا نہ بادل برسے
ایک اک قطرے کو پانی كے شہہِ دیںؑ ترسے
خون برسا نہ برسنا تھا نہ بادل برسے

پیاس جب حد سے بڑھی رو کے سكینہؑ نے کہا
دور کتنی ہے چچا نہر بتاؤ گھر سے
خون برسا نہ برسنا تھا نہ بادل برسے

اب کہاں خاک پہ بیٹھی ہو سكینہؑ اٹھو
کون آیا ہے پلٹ کر جو گیا رن گھر سے
خون برسا نہ برسنا تھا نہ بادل برسے

گُھڑکیاں شمر کی کھائیں جو کیا باپ کو یاد
کان كے درد سے روئی تو تمانچے برسے
خون برسا نہ برسنا تھا نہ بادل برسے

ابھی شبیرؑ ہے زندہ وہیں ٹھہرو زینبؑ
تم کو اکبرؑ کی قسم تم نہ نکلنا گھر سے
خون برسا نہ برسنا تھا نہ بادل برسے

میرے نانا كے مدینے تجھے زینبؑ کا سلام
ٹھوکریں کھا کے پلٹ آئی ہوں میں در در سے
خون برسا نہ برسنا تھا نہ بادل برسے

حق و باطل کا ہو ٹکراؤ تو دل لڑتے ہیں
جنگ یہ جیتی نہیں جاتی کبھی لشکر سے
خون برسا نہ برسنا تھا نہ بادل برسے

ایک اک قطرے کو پانی كے شہہِ دیںؑ ترسے
خون برسا نہ برسنا تھا نہ بادل برسے